आज मिति २०८१।०३।०३ गते सुदूरपश्चिम प्रदेश प्रहरी कार्यालय धनगढी कैलालीका प्रदेश प्रहरी प्रमुख प्रहरी नायब महानिरीक्षक  श्री रविन्द्र के.सी.ले जिल्ला प्रहरी कार्यालय मार्तडी बाजुराको कार्यालय परिसर, बिभिन्न शाखाहरू,हिरासत कक्ष, मेश लगायतको निरीक्षण गर्नु भयो । सो अवसरमा उहाँले जिल्ला प्रहरी कार्यालय बाजुराका प्रमुख प्रहरी नायब उपरीक्षक श्री दिलिप गिरी तथा उक्त कार्यालयमा कार्यरत अन्य प्रहरी अधिकृत तथा जवानहरूलाई  प्रहरी आचरण ब्यबहार तथा काम कर्तब्यको बारेमा आवश्यक निर्देशन दिनु हुंदै नागरिक मैत्री , निष्पक्ष र पारदर्शी एवं ब्याबसायिक प्रहरी सेवाका लागि   निष्ठापूर्बक कार्यरत रहन निर्देशन दिनु भयो । उहाँले लागु औषध, प्रतिबन्धित जडिबूटीहरू, ओखेटोपहार र नदीजन्य पदार्थहरूको दोहन नियन्त्रण गर्न सशक्तरूपमा क्रियाशील रहन पनि निर्देशन दिनु भयो । यस क्रममा उहाँले जिल्लाको समग्र शान्ति सुरक्षाको अवस्था र सम्भावित विपद जोखिम र प्रतिकार्य तयारीको बिषयमा जानकारी लिंदै नागरिकको जिउधनको सुरक्षाको लागि सबै प्रहरी कर्मचारीहरु पूर्ण प्रतिबद्धताका साथ क्रियाशील रहनु पर्ने  धारणा पनि  ब्यक्त गर्नु भयो ।

   आजै  उहाँले सदरमुकाम मार्तडीमा प्रमुख जिल्ला अधिकारी श्री भीमकान्त पौडेल लगायत जिल्ला सुरक्षा समितिका पदाधिकारीहरूसंग पनि बिपद प्रतिकार्य तयारी तथा जिल्लाको समग्र शान्ति सुरक्षाको अवस्था र चुनौतीको बारेमा समेत छलफल गर्नु भयो । साथै मार्तडी स्थित बडिमालिका नगरपालिकाको कार्यालयमा जानु भई नगर प्रमुख श्री अमर खडका र उप-प्रमुख श्री नन्दा थापा एवं न्यायिक समिति तथा स्वास्थ्य सम्बन्धि पदाधिकारीहरूसंगको बैठकमा सहभागी भई जातीय छुवाछुत, घरेलु हिंसा लगायत अन्य सामाजिक अपराधको अवस्था र चुनौतीहरूको बारेमा छलफल गर्नु भयो । यस अवसरमा  उहाँले कानूनी राज्यको स्थापना गर्न प्रहरी र स्थानीय सरकार बीचको साझेदारीको महत्वको बारेमा समेत आफ्नो धारणा राख्नु भयो । 

  आजै अपरान्ह प्रहरी नायब महानिरीक्षक के.सी. अछाम जिल्लाको सांफेबगरमा आयोजित जिल्ला प्रहरी कार्यालय अछामको शान्ति सुरक्षा सम्बन्धी बैठकमा सहभागी हुनु भयो । उक्त कार्यक्रममा प्रदेश प्रहरी कार्यालय धनगढीका प्रहरी नायब उपरीक्षक श्री भरत बहादुर चौधरी , जिल्ला प्रहरी कार्यालय प्रमुख प्रहरी नायव उपरीक्षक श्री सन्तोष पाठक र ईलाका प्रहरी कार्यालय सांफेबगरका प्रमुख प्रहरी निरीक्षक श्री खगेन्द्र साउंद लगायत अछाम जिल्ला प्रहरी कार्यालय मातहतका सम्पुर्ण कार्यालयका कार्यालय प्रमुख प्रहरी अधिकृतहरूको सहभागिता रहेको थियो । सो अवसरमा प्रहरी नायब उपरीक्षक सन्तोष पाठकले जिल्लाको शान्ति सुरक्षाको अवस्थाको बारेमा प्रस्तुतीकरण गर्नु भएको थियो । त्यस पश्चात सहभागीहरूसंग अन्तरक्रिया गरि प्रहरी नायब महानिरीक्षक के.सी.ले समसामयिक बिषयमा निर्देशन समेत दिनु भएको थियो ।

  सोही कार्यक्रममा उहाँले मिति २०८१।०२।२७ गते कर्णाली नदीको झोलुंगे पुलमा रसी चुंडिन गई पुलको बीच भागमा फसेका खच्चडहरूको उद्दार कार्यमा साहसिक भूमिका निर्वाह गर्नु हुने प्रहरी सहायक निरीक्षक श्री राम सिंह फराल र प्रहरी हवल्दार श्री गंगाराम चौधरीलाई प्रदेश प्रहरी कार्यालयबाट पूर्व घोषित नगद पुरस्कार समेत प्रदान गर्नु भयो ।