धनगढी, ०४ भदौ

        आज मिति २०८१।०५।०४ गतेका दिन सुदूरपश्चिम प्रदेश प्रहरी कार्यालय धनगढीमा सुदूरपश्चिम प्रदेश प्रहरी प्रमुख प्रहरी नायव महानिरीक्षक रबिन्द्र के.सी. ज्यूको प्रमुख आतिथ्यतामा आयोजित एक कार्यक्रमका बिच प्रहरी नायव उपरीक्षक कलेन्द्र बिक्रम शाहीको बिदाई, प्राबिधिक प्रहरी नायव उपरीक्षक डा. नविन लागेजुको फेरी भेटौला र प्राबिधिक प्रहरी उपरीक्षक डा. शोभा वाग्लेको स्वागत कार्यक्रम सम्पन्न भएको छ ।

        नेपाल प्रहरी संगठनमा २९ बर्ष ५ महिना ३ दिन सम्म सेवा गरि उमेर हदका कारण अनिवार्य अवकास जानु भएका प्रहरी नायव उपरीक्षक कलेन्द्र बिक्रम शाहीको बिदाई कार्यक्रमलाई सम्बोधन गर्नुहुदै प्रमुख अतिथि प्रहरी नायव महानिरीक्षक रबिन्द्र के.सी.ज्यूले संगठनमा सक्रिय सदस्यको रूपमा रहँदा अनुशासित र निष्ठावान रहि आफ्नो जिम्मेवारी सफलतापूर्वक निर्वाह गरि संगठनमा पुर्‍याउनु भएको योगदानको उच्च कदर स्वरुप हार्दिक बधाई दिदै मायाको चिनो समेत प्रदान गर्नुभयो । साथै  नागरिक जीवनमा पनि समाजमा शान्ति-सुरक्षा र अमन चयन कायम गर्न वर्दी विनाको प्रहरीको रुपमा भुमिका निर्वाह गर्न आग्रह गर्नु हुँदै आगामी दिनहरुमा पनि उहाँको जीवन सुखमय र समृद्ध हुन सकोस भनि शुभकामना दिनुभयो ।

कार्यक्रममा अवकाश जान लाग्नु भएका प्रहरी नायव उपरीक्षक कलेन्द्र बिक्रम शाहीले आफुले सशस्त्र द्वन्द देखि बिभिन्न राजनितिक परिवर्तनहरुमा राष्ट्र र संगठनले सुम्पेको जिम्मेवारी आफ्नो ज्ञान, सिप र क्षमताले भ्याएसम्म निष्ठापुर्वक सम्पन्न गरेको र प्रहरी सेवामा रहँदा आफ्नो जिम्मेवारी निर्वाह गर्ने क्रममा संगठनका अग्रजहरु तथा परिवारजनबाट समेत साथ, सहयोग र शुभेच्छा प्राप्त भएको भनि आफ्नो मन्तव्य राख्नु भएको थियो । साथै उक्त कार्यक्रममा सुदूरपश्चिम प्रदेश प्रहरी अस्पताल दिपायलबाट नेपाल प्रहरी अस्पताल महाराजगंज, काठमाण्डौ काज सरुवा भई जानु भएका डा. नविन लागेजुले यस सुदूरपश्चिम प्रदेश प्रहरी अस्पतालको प्रमुखको रुपमा करिव १ बर्ष कार्यरत रहँदा संगठनले सुम्पेको जिम्मेवारी आफ्नो ज्ञान, सिप र क्षमताले भ्याएसम्म इमान्दारी पुर्वक निर्वाह गरेको र सो क्रममा यस सुदूरपश्चिम प्रदेश प्रहरी कार्यालयबाट प्राप्त भएको सहयोग, सुझाव, सल्लाह र सद्धभावपुर्ण निर्देशनको लागि आभार प्रकट गर्नु भयो ।

        उक्त कार्यक्रममा सुदूरपश्चिम प्रदेश प्रहरी कार्यालय धनगढीमा कार्यरत प्रहरी बरिष्ठ उपरीक्षक ज्यूहरु दिल्लीराज विष्ट र श्याम कृष्ण अधिकारी सहित सिनियर प्रहरी अधिकृतहरू तथा अन्य प्रहरी कर्मचारीहरूको समेत उपस्थिति रहेको थियो ।